Noyabr ayının 18-də rayon icra hakimiyyətinin başçısı Natiq Ağayev Kortala kəndində qəbul keçirib. Qəbulda Balakən Rayon İcra Hakimiyyəti başçısı Aparatının məsul əməkdaşları, hüquq-mühafizə orqanlarının, xidmət təşkilatlarının rəhbər işçiləri və kənd sakinləri iştirak ediblər.

Balakən Rayon İcra Hakimiyyətinin başçısı Natiq Ağayev çıxış edərək ictimai-siyasi sahədə baş verən mühüm hadisələrə toxunub, qarşıda duran vəzifələrdən danışıb. Həmçinin ölkəmizdə əhalinin rifahının yaxşılaşdırılması istiqamətində atılan addımlar, həyata keçirilən sosial siyasətdən bəhs edib.  Həmçinin Balakən rayonunda icra olunan abadlıq-quruculuq işləri və əhalinin sosial problemlərinin həlli ilə bağlı görülən tədbirlər barədə iştirakçılara ətraflı məlumat verib.

RİHB-nin birinci müavini Turan Dibirov, Kortala kənd inzibati ərazi dairəsi üzrə nümayəndə Anar Bayramov çıxış edərək kəndin əhalisi, sosial-iqtisadi inkişafı, məşğulluq vəziyyəti və ərazidə həyata keçirilən işlər barədə, həmçinin  son səyyar qəbul zamanı qaldırılan məsələlərin icra vəziyyəti ilə bağlı məlumat veriblər.

Sonra kənd sakinlərinin müraciətlərinə baxılıb. Həbib Ziyadov  enerjinin verilişində fasilələrin yaranması, Kortala kənd tam orta məktəbdə sanitar qovşağın yararsız vəziyyətdə olması, Bilal Butdayev kənd körpələr evi uşaq bağçasına odun yanacağının az verilməsi, bələdiyyə torpaqlarının icarə haqqının artırılması, Kamran Şibliyev həyətyanı torpaq sahəsi üçün çıxarışın alınması, Umarpaşa Nağıyev Katex çayının kəndin ərazisindən keçən hissəsində pay torpaqlarının sel sularından mühafizəsi üçün beton bənd qurulması,  kəndarası yolların təmir olunması, Azər Kərimov Kortala kənd tam orta məktəbinin qəzalı vəziyyətə düşməsi barədə aidiyyəti mütəxəsislər tərəfindən baxış keçirilməsi və yeni məktəbin tikilməsi, İlham Şibliyev pay torpaq sahəsindən keçən  qəzalı olan yüksək gərginlikli elektirik dayaqlarının və xətlərinin yenilənməsi, evlərin və yardımçı tikililərin çardaqlarında qışlayan Qəhvəyi mərmər bağacığının məhv edilməsi üçün kimyəvi mübarizə üsulunun aparılması, Əli Xırxırov Balakən çayının Beçaqar yaşayış məntəqəsindən keçən hissəsində beton bəndin vurulması ilə bağlı rayon rəhbərinə müraciət ediblər.

Vətəndaşların müraciətləri ayrı-ayrılıqda dinlənilib, məsələlər müzakirə edilib və həll olunması üçün aidiyyəti üzrə tapşırıqlar verilib.

Vətəndaşlar problemlərinin həlli istiqamətində göstərilən diqqət və qayğıya görə ölkə rəhbərliyinə minnətdarlıqlarını bildiriblər.

Qeyd edək ki, Prezident İlham Əliyevin müvafiq tapşırıq və tövsiyələrinə uyğun olaraq keçirilən səyyar görüşlər mütəmadi olaraq davam etdirilir.

Şahidi olduğunuz hadisələri çəkib bizə göndərin! 7/24 whatsapp