Balakən Yaşıllıq Təsərrüfatı Sahəsi MMC-nin rəisi tərəfindən Balaken.info-ya ünvanlanan müraciəti olduğu kimi təqdim edirik:

Hörmətli Balakən sakinləri və rayonumuzun qonaqları!

Doğma Balakənimizin hər bir guşəsinin təmiz, abad və yaşıl olması bizim ən böyük hədəfimizdir. Son dövrlərdə şəhərimizin parklarında, xiyabanlarında və mərkəzi küçələrində aparılan genişmiqyaslı yaşıllaşdırma işləri, əkilən bəzək kolları, ağaclar və gül kolları rayonumuza xüsusi bir gözəllik qatır. Bu gözəlliyin arxasında isə böyük bir zəhmət və əmək dayanır.

Lakin təəssüflə qeyd etmək istəyirəm ki, bəzi fərdi təsərrüfat sahiblərinin məsuliyyətsizliyi ucbatından iribuynuzlu və xırdabuynuzlu mal-qaranın şəhər mərkəzində, küçə və yollarda başıboş buraxılması halları müşahidə olunur. Küçələrə buraxılan heyvanlar yaşıl sahələrə ciddi ziyan vurur: Böyük zəhmətlə əkilən gül kolları, bəzək bitkiləri və cavan ağaclar məhv edilir.

Yol hərəkəti təhlükəsizliyini pozur. Küçə və yollara çıxan mal-qara sürücülər üçün qəza şəraiti yaradır, sakinlərin sərbəst hərəkətinə mane olur.
Şəhərin antisanitar vəziyyətə düşməsinə səbəb olur: Parklar və səkilər çirklənir, şəhərimizin estetik görkəminə xələl gəlir.

Balakən Yaşıllıq Təsərrüfatı Sahəsi MMC olaraq hər bir sakinimizi rayonumuzun təbiətinə və çəkilən əməyə hörmətlə yanaşmağa dəvət edirəm. Unutmayaq ki, Balakən bizim ümumi evimizdir və onun gözəlliyini qorumaq hər birimizin vətəndaşlıq borcudur.

Təsərrüfat sahiblərindən xahiş və tələb olunur ki, mal-qaralarını şəhər daxilində nəzarətsiz buraxmasınlar, heyvanların otarılmasını yalnız icazə verilən fərdi sahələrdə həyata keçirsinlər. Əks təqdirdə, şəhərin infrastrukturuna və yaşıllıqlarına ziyan vuran, eləcə də asayişi pozan şəxslər barəsində qanunvericiliyə uyğun olaraq müvafiq tədbirlərin görülməsi üçün aidiyyəti qurumlara müraciət olunacaqdır.

Gəlin, Balakənimizin yaşıl gələcəyini və gözəlliyini birlikdə qoruyaq!

Hörmətlə,
Zeynalabid Əmrəliyev
Balakən Yaşıllıq Təsərrüfatı Sahəsi MMC-nin rəisi

Şahidi olduğunuz hadisələri çəkib bizə göndərin! 7/24 whatsapp