Balakəndə 2 İyul Azərbaycan Polisi Günü münasibətilə tədbir təşkil olunub.

Balakən Rayon Polis Şöbəsində keçirilən tədbirdə Balakən Rayon İcra Hakimiyyətinin başçısı Natiq Ağayev, rayonun hüquq-mühafizə orqanlarının rəhbərləri, polis veteranları və Rayon Polis Şöbəsinin şəxsi heyəti iştirak ediblər.

Tədbir iştirakçıları əvvəlcə Ümummilli Lider Heydər Əliyevin abidəsini ziyarət edərək önünə gül dəstələri düzüb, dahi şəxsiyyətin xatirəsini ehtiramla yad ediblər. Daha sonra Şəhidlər xiyabanı ziyarət olunaraq Vətən uğrunda canlarını fəda etmiş qəhrəmanların əziz xatirəsinə hörmət ifadə edilib.

Rəsmi hissədə əvvəlcə Ümummilli Lider Heydər Əliyevin, Azərbaycanın ərazi bütövlüyü uğrunda şəhid olmuş qəhrəmanların, eləcə də xidməti borcunu yerinə yetirərkən həlak olan polis əməkdaşlarının xatirəsi bir dəqiqəlik sükutla anılıb. Ardınca Azərbaycan Respublikasının Dövlət Himni səsləndirilib.

Balakən Rayon Polis Şöbəsinin rəisi, polis polkovniki Çingiz Aslanov çıxış edərək şəxsi heyəti peşə bayramı münasibətilə təbrik edib. O, daxili işlər naziri, general-polkovnik Vilayət Eyvazovun polis əməkdaşlarına ünvanladığı təbrik məktubunu da tədbir iştirakçılarının diqqətinə çatdırıb.

Tədbirdə çıxış edən Balakən Rayon İcra Hakimiyyətinin başçısı Natiq Ağayev polis əməkdaşlarını təbrik edib, onlara xidmətdə uğurlar arzulayıb. Bildirib ki, Azərbaycan polisi ötən dövrdə şərəfli yol keçib, ölkəmizdə müstəqilliyin və daxili sabitliyin təmin olunmasında mühüm rol oynayıb. Ulu Öndər Heydər Əliyevin rəhbərliyi ilə aparılan hüquqi islahatların nəticəsi olaraq, polis vahid hüquq-mühafizə orqanı kimi formalaşıb. Hazırda dövlət başçısının diqqət və qayğısı sayəsində davamlı inkişafda olan daxili işlər orqanları ölkədə cinayətkarlığa, onun transmilli növlərinə qarşı mübarizədə, asayişin və təhlükəsizliyin təmin olunmasında önəmli xidmətləri ilə seçilir. Prezident, Ali Baş Komandan İlham Əliyevin rəhbərliyi ilə böyük qələbə ilə nəticələnən 44 günlük Vətən müharibəsində Daxili İşlər Nazirliyinin hərbi qulluqçuları vahid komandanlıq altında xüsusi qəhrəmanlıq göstərib.

Sonda xidməti fəaliyyətində yüksək nəticələr əldə etmiş bir qrup polis əməkdaşı Fəxri Fərman və qiymətli hədiyyələrlə təltif olunub.

Şahidi olduğunuz hadisələri çəkib bizə göndərin! 7/24 whatsapp